Шляхам жыцьця (1913)/III/Як у лесе зацьвіталі…

Як у лесе зацьвіталі…
Верш
Аўтар: Янка Купала
1913 год

Іншыя публікацыі гэтага твора: Як у лесе зацвіталі…

Прапануем да спампаваньня!

Як у лесе зацьвіталі.

Як у лесе зацьвіталі
Ліпа ды каліна,—
Залатые сны снавалі
Мы с табой, дзяўчына.
Калыхаліся, шумелі
Вольные бярозы,
Шэпацелі, шэлясьцелі
Трысьнягі ды лозы.

* Як у жыце наліліся

Каласкі нагінна,—
Сустрэліся, абняліся
Мы с табой, дзяўчына.
Мігацелі, зігацелі
У пракосах косы,
Заміралі кветкі, зельле,
Заміралі росы.

*

Як дасьпела, шчырванела
Ягада—рабіна,—
Ўвакруг глянулі нясьмела
Мы с табой, дзяўчына.
Верасы пад лісьцям спалі,
Бор зялёны гнуўся,
Недзе пелі ў цёмнай далі
Журавы ды гусі…