Шляхам жыцьця (1913)/III/Не прасьпі…

← * * * «З зорак усходніх, заходніх…»

Не прасьпі… Верш Аўтар: Янка Купала 1913 год

Як у лесе зацьвіталі… →

Іншыя публікацыі гэтага твора: Не прасьпі.

Прапануем да спампаваньня!

Не прасьпі…

Сьпі, дзяўчына, покуль сонцэ
Не зайграло над хацінай;
А як сонцэ на ваконцэ
Блескі кіне—ўстань, дзяўчына!
Ўстань, зніміся, схамяніся,
Ўмыйся сочнаю расою,
Сэрцам к сонцу прытуліся,
Ветру дай гуляць с касою!
Ў сонцы війся далей, выжэй,—
Паланей, красуй дзянінай,
Не пужаючыся крыжа,
Сонцу роўная дзяўчына!
Заіскрыся кветкай белай
На зялёнай сенажаці;
Кінь патолю думцы сьмелай,
Пасмы радасьці снаваці…
Негаданай песьняй-казкай
Разыграецца часіна…
З сонцам, з сэрцам, з вечнай ласкай
Не прасьпі вясны, дзяўчына!..

---