Шляхам жыцьця (1913)/I/Мой дом

← Мая думка

Мой дом Верш Аўтар: Янка Купала 1913 год

Як я полем іду… →

Іншыя публікацыі гэтага твора: Мой дом (Купала).

Прапануем да спампаваньня!

Мой дом.

Мой дом—прывольле звёзднай далі,
Арламі мераны абшар,
Гдзе бітвы точуць ветраў хвалі
З сямьёй глухіх калматых хмар.

*

Мой дом—амшалай пушчы сховы,
Сяліба ясеняў, сасон,
Гдзе сьмех русалчын, лясуновы
Палошыць вечна-цяглы сон.

*

Мой дом—пешчаные разлогі—
Пакута сцюжы і сьпякот,
Гдзе ў скібах лад вядуць нарогі,
Аздобай цьвет—чырвоны пот.

*

Мой дом—узьмежных зёлак восьці,
З сухой асінаю курган,
Гдзе тлеюць прадзедавы косьці,
Гдзе плачэ ночка ды туман.

---