З маіх песень

З пляцоўкі Вікікрыніцы
Jump to navigation Jump to search
З маіх песень
Верш
Аўтар: Янка Купала
1905—1907
Крыніца: http://rv-blr.com/pages/book_contents.jsp?idLit=2663#646



Што нахлыне ў душу,
Што сасьню вечаром,
Праз што вочы рашу, —
Усё выльлю пяром.

Усё выльлю і ў сьвет
Песьняй лётнай пашлю, —
Няхай зь віхрам усьлед
Аблятае зямлю!

Хай лятае ўвакруг
Над скаванай зямлёй,
Дзе сьпяць сіла і дух,
Дзе брат свой, як ня свой!

І тых будзіць, хто сьпіць,
Хто цярпіць безь віны;
Няхай гулка грыміць,
Як званы, перуны!

Можа, гэтакі звон
Даляціць да нябёс,
Аддасьць Богу паклон,
Скажа, сколькі лью сьлёз!

(1905—1907)