Збор твораў (Купала, 1925—1932)/I/Жалейка/Любімось, мае суседзі!

← Чаго нам трэба

Любімось, мае суседзі! Верш Аўтар: Янка Купала 1925 год

Шчасьце →

Іншыя публікацыі гэтага твора: Любімось, мае суседзі!

Прапануем да спампаваньня!

ЛЮБІМОСЬ, МАЕ СУСЕДЗІ!

Любімось, мае суседзі!
Кіньма сваркі, звадкі;
Жыйма, як родныя дзеці
Аднэй нашай маткі!

Што ты маеш з сваёй звадкі,
З дзікай ненавісьці?
Людзі толькі насьмяюцца,
І ўсёй тэй карысьці.

Людзі толькі насьмяюцца,
Ўрагі скарыстаюць,
Над душой чорт запануе,
Ўнукі цябе злаюць.

А пачнема жыці ў згодзе
Ў пачцівай, харошай, —
Знойдзем долю, знойдзем волю,
На зваротак — грошы.

Ўрагом нашым прыступіцца
Трудна тады будзе,
Ды ў суседзяў ласку маюць
Згодлівыя людзі.

Дык любімася, суседзі!
Кіньма сваркі, звадкі;
Жыйма, як родныя дзеці
Аднэй нашай маткі!

---