Lekcyi i Evanelii na niadzieli i śviaty (1938)/I/29
| ← 28. Na II niadzielu pa Siomusie (U aktavie Božaha Cieła) | 29. Na III niadzielu pa Siomusie Урыўкі зь Бібліі 1938 год Пераклад: Адам Станкевіч |
30. Na IV niadzielu pa Siomusie → |
Прапануем да спампаваньня!
NA III NIADZIELU PA SIOMUSIE.
I.
Darahija, spakaryciesia pad mahutnaj rukoj Boha, kab vas uzvyšyŭ padčas adviedzinaŭ. Usie kłapoty vašy na jaho ŭskladajcie, bo jon rupicca ab vas. Budźcie ćviarozymi i čujciesia, bo praciŭnik vaš djabał jak leŭ rykajučy kružyć, šukajučy, kaho-by prahłynuć, jakomu spraciŭlajciesia silnyja vieraj, viedajučy, što hetkija-ž mučeńni zdarajucca bratom vašym, što jość na śviecie. A Boh usialakaje łaski, katory paklikaŭ nas da viečnaj svajej słavy ŭ Chrystusie Jezusie, sam vas — krychu praciarpieŭšych — udaskanalić, uzmocnić i ŭtvierdzić. Jamu słava i vaładańnie na vieki viečnyja. Amen.
(1 Piotr 5, 6—11).
II.
U heny čas zbližalisia da Jezusa mytniki i hrešniki, kab słuchać jaho. Faryzei-ž i vučonyja narakali, kažučy: hety pryjmaje hrešnikaŭ i jeść z imi! A jon skazaŭ im takuju prypovieść: chto z vas, majučy sto aviec, kali adnu z ich zhubić, nie pakidaje dzieviaćdziesiat dzieviać na pustyni i nia jdzie za tej, što zahinuła až pakul jaje nia znajdzie? A jak znajdzie jaje, radasna kładzie na plečy svaje, a pryjšoŭšy damoŭ, sklikaje pryjacielaŭ i susiedziaŭ, kažučy im: viesialiciesia sa mnoj, bo ja znašoŭ aviečku svaju, što była prapaŭšy? Kažu vam, što taksama ŭ niebie bolš budzie radaści z adnaho pakutujučaha hrešnika, jak z dzieviaćdziesiat dzieviacioch spraviadlivych, katorym pakuty niatreba. Abo jakaja žančyna, što maje dziesiać drachmaŭ, kali zhubić adnu drachmu, ci-ž nie zapalvaje śviatła, i nia vymiataje chaty, i nia šukaje staranna až pakul nia znajdzie? A jak znajdzie, zazyvaje pryjacielak i susiedak, kažučy: ciešciesia sa mnoj, bo ja znajšła drachmu, što była zhubiŭšy. Tak, kažu vam, budzie radaść u Božych aniołaŭ z adnaho hrešnika, što pakutuje.
(Łuk. 15, 1—10).