Шляхам жыцьця (1913)/II/Сад

Сад
Верш
Аўтар: Янка Купала
1913 год

Іншыя публікацыі гэтага твора: Сад (Купала).

Прапануем да спампаваньня!

Сад.

Гальлё панадна разлапушыў
За хатай прадзедавай сад;
Чарэшні, яблыні і грушы
Зыйшліся згодліва у рад.
Ківаюць макоўкамі ўдала,
Плывуць напевы ад галін,
Якбы з іх кожная ўзывала:
«Хадзі, бяспутнік, атпачынь!
«Хадзі, усядзься каля нас ты,
«Жыцьця прыгод забудзь напасьць,
«Паслухай музыкі лісьцястай:
«Яна табе гарт новы дасьць.
«Ты многа йшоў, блудзіў ты многа,—
«Жадання крыж ты нёс і нёс,
«Аж на растайных стаў дарогах;
«Цяпер—да нас ад бур і сьлёз!..»
Так бытцым вабіць сад лісткамі
Пад цень свой думку многа лет;
А думка што? яна з ветрамі,
Ня знай за чым, ляціць у сьвет…