Збор твораў (Купала, 1925—1932)/II/Па межах родных/Мой край

← ⁂ (Па межах родных…)

Мой край Верш Аўтар: Янка Купала 1926 год

Над Нёманам →

Іншыя публікацыі гэтага твора: Мой край (Купала).

Прапануем да спампаваньня!

МОЙ КРАЙ

Ляжаць твае гоні-загоны
Стомільна на сьвеце на белым
І жаляцца руняй зялёнай,
І коласам жаляцца сьпелым.

Лес-ноч гаманіста, шумліва
З мінуўшчыны казкі складае
І шле іх далёка па нівах,
Плакуча, ад краю да краю…

Паводкаю коцяцца воды
Руч‘ёў паміж долаў і гораў,
У хвалях пагодай-нягодай
Купаючы нівы-разоры.

Спавітыя плесьняю вёскі
Між пустак заселі бясьсільна,
Ўтуліўшыся ў цені бярозкі
На вечным кургане бадыльным.

А люд?.. Ён сагнуўшыся ходзе
Пад ношкай зьнямогі-пакуты
І, роячы сны а свабодзе,
З дня ў дзень сам сабе куе путы.

Так сьпіш, так жывеш мімаходам,
Мой край, як сьцяпная магіла,
З сваім незавідным народам,
З патухшай і славай і сілай.

---