Збор твораў (Купала, 1925—1932)/II/Бацькаўшчыне/Брату

← Грай-жа, музыка…

Брату Верш Аўтар: Янка Купала 1926 год

Як спытаюцца нас →

Іншыя публікацыі гэтага твора: Брату (Купала).

Прапануем да спампаваньня!

БРАТУ

Мой ты ўбогі, мой ты цёмны,
Родны мой,
Ты пытаеш, хто такія
Мы з табой?

Ці мы людзі, ці скаціна, —
Запытай
Гэту коску, гэту сошку,
Гэты гай;

Гэта поле, на якім ты
Млееш, млеў;
Гэту згніўшую хацінку,
Гэты хлеў.

Запытайся сваёй долі,
Сваіх пут,
Ці мы людзі, ці скаціна,
Хто мы тут?

---