Збор твораў (Купала, 1925—1932)/I/Жалейка/Захад сонца

← Песьня жней

Захад сонца Верш Аўтар: Янка Купала 1925 год

Выйду… →

Іншыя публікацыі гэтага твора: Захад сонца (Купала).

Прапануем да спампаваньня!

ЗАХАД СОНЦА

За нязнаную
Даль пахмурную
Закацілася
Ясна сонейка.

Ой, пара, пара
Табе, добрае,
Адпачыць пайсьці,
Посьле дня ўсяго.

Нахадзілася,
Нагулялася
Над зямелькаю
Па-над крыўднаю.

Бачыць трэ‘ было,
Каб уродаю
Ніва ўбогая
Убіралася.

Сагрэць трэ‘ было
Бяспрытоннага,
Сьлёзы высушыць
Абнядоленым.

Усьміхаціся
Ўсім замучаным
Доляй-радасьцяй,
Воляй-сокалам,

Посьле гэтакай
Працы-мачыхі,
Спачынь, сонейка,
Там за горамі.

І на заўтра ўстань
З новай сілаю,
Узьнімі агні
Ў сэрцы стухшыя.

Распалі агні
Веры ў будучнасьць,
Што дзён лепшых мы
Дачакаемся.

---