Збор твораў (Купала, 1925—1932)/I/Гусьляр/Зімой у лесе

← Зазімак

Зімой у лесе Верш Аўтар: Янка Купала 1925 год

Кат →

Іншыя публікацыі гэтага твора: Зімой у лесе.

Прапануем да спампаваньня!

ЗІМОЙ У ЛЕСЕ

І лягла-ж цішына
У бары за гарой, —
Каб дравінка адна
Хоць кіўнула сабой.

Сьнег пушаны залёг
На галінах сасон,
І чарнобель, і мох
Атуліў сабой ён.

Сокат птушак замёр,
Як-бы поўнач была,
Адно сьвісьне тапор
Ды зазвоне піла.

Гэта сілу сваю
Так прабуе мужык;
Рухнуў дуб на зямлю,
Як магуч і вялік…

Далей — глуш, цішына
У бары за гарой, —
Каб дравінка адна
Хоць кіўнула сабой.

---