Беларусі ордэнаноснай (1937)/Вялікаму Кастрычніку

Вялікаму Кастрычніку
Верш
Аўтар: Янка Купала
1937 год

Іншыя публікацыі гэтага твора: Вялікаму Кастрычніку (Купала).

Прапануем да спампаваньня!

ВЯЛІКАМУ КАСТРЫЧНІКУ

Была Расія царскіх дзён,
А дні былі як ночы,
Душыў бязлітасны прыгон
Сялянаў і рабочых.

Разбэшчана паны, купцы
Працоўным людам гандлявалі,
Раслі магільныя капцы,
Папы малебны завывалі.

Над краем шыбеніц, астрогаў
Трыумфаваў каронны кат…
Было яно — ўладарства злога —
Пятнаццаць год таму назад.

Паўстаў пракляццем катаваны,
Паўстаў, хто з голаду век пух,
Апалі рабскія кайданы;
Апаў нявольніцтва ланцуг.

Паўстаў магутны пролетарый,
Чырвоны ўзняўшы сцяг ўрачыста,
І рушыў ў бітву грознай хмарай
Супроць сатрапаў і царыстаў.

Паўстаў ніштожыць цьму і здзекі,
Ніштожыць царскае ўладанне,
Знішчаць адвечны гнёт навекі
Для свайго светлага йснавання.

І зарунеў на ўсе староны
Саюз Рэспублікаў Совецкіх,
Перамогшы ворагаў пагромных
І нутраных і інтэрвенцкіх,

Красуй-жа ў радасці няспынна,
Краіна вольная Советаў,
Ядыная пакуль айчына
Усіх працоўных ўсяго свету.

Пролетарыят усіх краінаў,
Пад сцягам Леніна удумна,
Шляхі, я веру, працярэбе
І да сусветнае Комуны.

1932 г.