Hołas dušy (1934)/III/Chrost i Kryžmawańnie
| ← Sakramenty | Chrost i Kryžmawańnie Публіцыстыка Аўтар: Казімір Сваяк 1934 год |
Pakuta i Eŭchrystyja → |
Прапануем да спампаваньня!
Chrost i Kryžmawańnie.
Chrost robić nas chryścijanami i daje začatki tych Boskich cnotaŭ wiery, nadziei i lubowi, katoryja słužać asnowaj da paznańnia i miławańnia Boha. Kryžmawańnie ŭdzialajecca ŭ tym časie, kali ŭžo začynajem paznawać zło: na ŭzmacnieńnie duchowych sił u zmahańni z im. Chrostu dziciaci nie adkładaj, ale starajsia čym-chutčej achryścić. Dzicia — istota kwołaja: moža zachwareć i ŭmiorci biaz Chrostu[1]. Nia wier zababonam, što žančyny čaŭpuć ab budučynie dziciaci pa naradzinach. Jak dzicia wyhaduješ, takim i budzie. Karmi dobra, adziawaj čysta, wučy razumna i žartuj z usieńkich warožbaŭ. Budzieš hadawać u čystacie i bajaźni Božaj, to daść Boh budzie jano zdarowaje i pryhožaje. Kumoŭ wybiraj ludziej dobrych i tałkowych.
Pa Chroście kumy praz chwilinu pawinny pamalicca na intencyju achryščanaha, a nie ŭciakać strymhałoŭ z kaścioła.
Dzicia, katoraje trymaŭ ty da Chrostu, ličycca tabie swajakom z Chrostu. Nie zabywaj, kaho maješ chrośnikam i daj jamu prykład žyćcia chryścijanskaha. Kali-b baćki twajho chrośnika pamiorli, abo žywučy nie staralisia dawiaści jaho da pieršaj spowiedzi i kamunii św., to twaim jość abawiazkam zrabić heta.
Kali da wašaj parachwii abo susiedniaj pryjaždžaje biskup dziela adwiedzin, pastarajsia dziaciej da Sakramentu Kryžmawańnia pryhatawaci. Sakrament Kryžmawańnia tak zawiecca tamu, što biskup, dajučy hety Sakrament, značyć čało alejkam, katory zawiecca Chryzma abo Kryžma i pry hetym wyhawarwaje takija słowy: „Značu ciabie znakam kryža i ŭzmacniaju Kryžmam zbaŭleńnia“. Da hetaha Sakramentu wybiary sabie adnaho świedku, katory niachaj pałožyć, padčas kali biskup padojdzie, ruku na prawaje plačo. Świedkaj dla chłapca pawinien być mužčyna, a dla dziaŭčaci — žančyna. Chto nie kryžmawany, nia moža być świedkam. Pa kryžmawańni nie wychadzi z kaścioła, ale čakaj až biskup daść bahasławienstwa. Prad kryžmawańniem treba nawučycca katechizmaŭ i być u spowiedzi, chiba chto jašče mały. Ale ŭ našym łacinskim abradzie małych nia kryžmujuć. Nia možna prystupać da hetataha Sakramentu bolš razu. U sławianskim abradzie Sakrament hety ŭdzialajecca zaraz pa Chroście. U abradzie łacinskim kryžmuje tolki biskup.
- ↑ U kožnaj wioscy pawinien być chto nawučany chryścić dzicia z wady ŭ patrebie. Paliwajučy hałoŭku wadoj nakryž, treba adnačaśna kazać: „Ja chryšču ciabie ŭ imia Ajca i Syna i Ducha światoha“.