Hołas dušy (1926)/II/Cyrylla i Metoda

← Światych Apostałaŭ Piatra i Paŭła

Cyrylla i Metoda, św. Apostałaŭ sławianskich Казаньне Аўтар: Казімір Сваяк 1926 год

Św. Jozefata, arcybiskupa Połackaha, mučanika za relihijnaje abjadnańnie Biełarusi →

Прапануем да спампаваньня!

Cyrylla i Metoda, św. Apostałaŭ sławianskich.
(7-ha lipnia).

1. Braty rodnyja Cyryll i Metod zmałku paświacilisia na słužbu Bohu. Stali jany nawučać Ewanhieliju pasławiansku i tamu nazwali ich Apostałami Sławian. Cyryll wydumaŭ sławianskija litary, jakija j ciapier jašče ŭžywajucca ŭ knihach abradu sławianskaha. Žyli ŭ IX wieku, a pamiać ich nakazaŭ światkawać u-wa ŭsim katalickim kaściele papiež Lawon XIII.

2. Cyryll byŭ, pawodle słoŭ tahočasnych asob, dziela swajej nawuki hłybokaj, nazywany filozafam, heta značyć luboŭnikam mudraści. Nawuku hetu nios jon najpierš dzikim i pahanskim chazaram, paśla ŭ Murawii, hdzie razam z bratam Metodam pracawaŭ nad ustanaŭleńniem nabaženstwa pasławiansku. Praca ich adnak spatkała worahaŭ, katoryja ŭdali ich prad papiežam Hadryjanam. Braty pajechali až u Rym i tam lohka apraŭdalisia prad Ajcom światym. Tam Cyryllu Boh sudziŭ dakanać žyćcia, a Metod dalej pracawaŭ miž Pannonami, Baŭharami i Dalmatyncami. Iznoŭ zaskaržany prad Rymam musiŭ jon druhi raz apraŭdacisia i atrymaŭ tady listy prawamocnyja ad Stalicy Apostalskaj.

3. Nie zwažajučy na ŭsie pieraškody, Metod dalej pracawaŭ dla Boha miž Sławianami. Pryjšoŭ nawiet, jak pakazwajuć, na Ruś i załažyŭ biskupstwa ŭ Lwowie i Kijewie. Paśla-ž wiarnuŭsia ŭ rodnuju Murawiju i tam, pačuŭšysia blizkim śmierci, naznačyŭ pa sabie namieśnika. Upomniŭšy jšče duchawienstwa i narod, kab Boha zaŭsiody bajalisia, addaŭ Chrystusawi čystuju dušu swaju.