Я відзеў душы сільныя…

З пляцоўкі Вікікрыніцы
Jump to navigation Jump to search
Я відзеў душы сільныя…
Верш
Аўтар: Янка Купала
1905—1907
Крыніца: http://rv-blr.com/literature/2663#665



 * * *

Я відзеў душы сільныя,
Якім віхры ўсьміхаліся
І пелі песьні дзіўныя,
Каб выйшлі і змагаліся;

Змагаліся зь няпраўдаю,
Змагаліся з кайданамі,
З кайданамі пякельнымі,
Зь людскіх касьцей каванымі.

І выйшлі людзі сільныя
На бітву на крывавую,
Дый сьмерцяю акрыліся,
Хоць несьмяротнай славаю.

І толькі плакаць хочацца
Над гэтымі ахвярамі,
Над гэтым краем змучаным,
Над гэтымі цяжарамі.

І толькі плакаць хочацца,
Прад цэлым сьветам жаліцца,
Што так зямелька родная
З ног ад нядолі валіцца!

(1905—1907)