|
Прышла восень, мужычок,
Ой, прышла!
Глянь, што ў пуню і тачок
Прынесла.
Працаваў ты, працаваў
Круглы год,
Разліваў ты, разліваў
Кроў і пот,—
Наградзіў-жэ малайца
Труд вялік:
Налажыў куток сенца
Наш мужык.
Злажыў торпамі ў таку
Скарб—снапы:
Акалоту у кутку
С поўкапы;
С копку грэчкі і аўса
Ў другі кут.
Вось і плата табе ўся
За твой труд.
Ідзі ў ток, ідзі да дня
Цэпам бі,
І кароўку і каня
Накармі;
Адбяры, што ўзяў вясной,
Ў магазын,
Насып мех ты збажыной,
Вязі ў млын…
Прышла восень, мужычок,
Ой, прышла!
Глянь, што ў пуню і тачок
Прынесла.
|
Прапануем да спампаваньня!