Шляхам жыцьця (1913)/I/С песень жыцьця

← Згнаннік

С песень жыцьця Верш Аўтар: Янка Купала 1913 год

Хмары і думы →

Іншыя публікацыі гэтага твора: Зь песень жыцьця (Час быў вясеньні. На скібіны дно…).

Прапануем да спампаваньня!

С песень жыцьця.

Час быў вясенні. На скібіны дно
Пало, ўзышло, зарунело зярно.
Ў курную хату на яве, ці ў сне
Доля-нядоля прынесла мяне.

*

Лето настало. Ўжо колас глядзеў,
Рос, красаваў, наліваўся,—дасьпеў.
Шчасьця, пацехі ня знаўшы ў жыцьцю
Вырас і я на нядолю сваю.

*

Восень на сьвеце. Бор стогне, шуміць;
Колас незжаты на полі стаіць,
Нудна у сэрцы: дзе вокам ня кінь,
І я, як той колас, бядую адзін…

*

Зімка прыйшла; белы вываліў сьнег;
Колас у гурбе знайшоў свой начлег,
З долей змагацца з сіл выбіўся я,
Эх, ты, магілка, эх, дзе ты мая?..

---