Шляхам жыцьця (1913)/I/Паляці, мая мысль…

← Сваякам па гутарцэ

Паляці, мая мысль… Верш Аўтар: Янка Купала 1913 год

Рвіся думка!.. →

Іншыя публікацыі гэтага твора: Паляці, мая мысьль…

Прапануем да спампаваньня!

Паляці, мая мысьль…

Паляці, мая мысьль, лётам со́кала,
І прагледзь гэты сьвет кругом-вокала.
Лётам сьветлай зары панад стрэхамі
Сып надзеяй жывой і пацехамі.
Пей аб волі людзям думкі цудные,
Уміляй іх жыцьця сьцежкі трудные.
Залатые сны ім нехай родзюцца,
Нехай жаль на душы супакоіцца.
Гонюць хай ад сябе цьмы нядольные,
І рука у руку пойдуць вольные.
Так ляці, эй, ляці, мысьль свабодная!
А ты міла спаткай, земля родная.

---