Шляхам жыцьця (1913)/I/Мая доля

З пляцоўкі Вікікрыніцы
Холадна… Мая доля
Верш
Аўтар: Янка Купала
1913 год
Прыста́ў я́ жыць…
Іншыя публікацыі гэтага твора: Мая доля (Што дасі заўтра, доля зьмянлівая…).

Спампаваць тэкст у фармаце EPUB Спампаваць тэкст у фармаце RTF Спампаваць тэкст у фармаце PDF Прапануем да спампаваньня!




Мая доля.

Што дасі заўтра, доля зьмянлівая,
Спадзяюся пацехі я мала;
Адно знаю, што ўсё нешчасьлівае
Ты мне толькі дагэтуль давала.

Сіратой па чужых кутох кідала
І нудою мне грудзі сушыла;
Не раз так мне была ты абрыдала,
Што ўсьмехалася шчасьцем магіла.

Ты, калі мне ў вачах разьясьнялася,
Сэрцэ білося верай, надзеяй,
Хоць незванаю знекуль яўлялася,
І тады адны сьлёзы я сеяў.

Ты шумела мне песьні магільные,
Як мяцеліца дзікая ў полі;
Ты несла мне усё непрыхільнае…
Эх, не знаць-бы цябе мне ніколі!

Мусіць, доля, ты ў цернях радзілася,
А зіма і слата гадавалі,
Ад няволі ты мучыць наўчылася,
А пасьля мне багі цябе далі…