Хоць ты, сэрца, лопні, трэсьні…

З пляцоўкі Вікікрыніцы
Jump to navigation Jump to search
Хоць ты, сэрца, лопні, трэсьні…
Верш
Аўтар: Янка Купала
1905—1907
Крыніца: http://rv-blr.com/vershu/view/653



 * * *

Хоць ты, сэрца, лопні, трэсьні,
Хоць ты выгані, пан, з хаты, —
Буду пець я свае песьні
Ці то ў будні, ці то ў сьвяты!

Думкі, оды пець я буду,
Каб усякі весяліўся,
Каб для гэтага тут люду
Сьвет інакшы адчыніўся!

Каб на полі ці на лузе,
Ці працуючы ля дому,
Ці у лесе, ці пры плузе
Пеў ён песьні па-сваёму!

Каб ніколі не чураўся
Сваёй родненькае мовы,
У якой узгадаваўся,
Хоць забыўся дзеля новай.

Дык пець буду табе, людзе,
Каб працёр свае ты вочы! —
А шмат лепей табе будзе,
Як адрозьніш дзень ад ночы.

Бо ты ж надта цёмны, браце,
Як ты тут у табакерцы, —
Хоць ня воўк — жывеш у хаце,
Хоць ты маеш душу, сэрца.

О, я знаю: сэрца маеш,
Бо па сьвінцы нават плачаш, —
А што мовай пагарджаеш,
Дык ты гэтага ня бачыш.

Гэй, прасьніся, беларусе!
Усе людцы паўставалі.
Гэй, прасьніся, беларусе!
Усе праўдачку пазналі.

(1905—1907)