Угрунь (1927)/Моладзь і сонца/Вясна ідзе

← Мяцеліца

Вясна ідзе Верш Аўтар: Андрэй Александровіч 1927 год

Возера →

Іншыя публікацыі гэтага твора: Вясна ідзе (Александровіч).

Прапануем да спампаваньня!

ВЯСНА ІДЗЕ…

Дзень чаканы,
дзень румяны,
дзень праменных струн,
дзень вясеньніх
лятуценьняў
к нам нясецца ўгрунь!

На спатканьне
звонкім раньнем
выйду ў сьвет-прастор.
Гляну, гляну —
дзень вясьняны
выплыве з-за гор.

Пры дарозе
тры бярозы,
тры бярозы ў рад
Дзень вясновы
шчырым словам
клічуць на пасад.

Цёмнасіняй
злоснай плыньню
мчыцца-рвецца лёд.
Сонца спаліць
і бяз жалю
срэбраны сумёт.

Дзень вясеньніх
лятуценьняў
к нам нясецца ўгрунь!
Выйду, гляну:
дзень жаданы,
дзень праменных струн…

5. IV. 27 г.