Угрунь (1927)/Моладзь і сонца/Возера

Возера
Верш
Аўтар: Андрэй Александровіч
1927 год

Іншыя публікацыі гэтага твора: Возера (Александровіч).

Прапануем да спампаваньня!

ВОЗЕРА

Ціхай гутаркай возера шэпча ў бары,
гнуцца сосны ад буйнага ветру.
Сонца гасіць ліхтар свой на скалах гары
і зьнікае ў няведамай нетры.

Ветрык змоўк… Цішыня… Веснавейны змрок…
Рдзее прозалаць зорак яскравых.
Пахмурнелі кусты, не шасьцяць і лісты,
толькі чуюцца песьні-праявы,

Пакорная ночанька звонкай вясьне
шалясьценьнямі славу зьвівае.
Месячык выплыў у срэбным чаўне —
баравое жыцьцё аглядае…