Старонка:Nashy dni 1937.pdf/93

КОМСАМОЛЬЦАМ

Прывет вам, племя маладое,
Зямель совецкіх яснацвет.
Дарога ваша — шлях герояў,
У новы дзень бліскучы след.

Як сонца першыя ў паходзе,
Стыхіям злым наперакор,
Ішлі вы з песняй, як разводдзе,
На штурмы скал і дзікіх гор.

Ішлі вы, юнасць-чарадзеі
З‘яднанай сілай грамады,
Перамагаючы завеі,
Дажджы і суш і халады.

І голас вашай песні звонкай
Лавіў прастор нябёс, зямлі,
І ціш балот, і шчыт сасонкі,
Дзе густа збіліся камлі.