Гэта старонка не была вычытаная
Зачыніла свет вайна,
А я з дзеткамі адна,
З дробнымі, малымі
Цяжка адной з імі.
Ці жывы ён, ці забіты,
Ці ў чужым палоне?
Шапаціць мне штосьці жыта,
Ды слоў не гамоніць.
У каго-ж я запытаю?
Нема ўсё навокал:
Дзе ты, дзе, у якім краю
Мой нявольнік-сокал?
Зачыніла свет вайна;
А я з дзеткамі адна.
Горка мне адненькай,
Сумна маладзенькай!
II
САЛДАЦКАЯ ПЕСНЯ
Старана чужая — не родная маці,
А касцей салдацкіх нагацілі гаці.
Эх, ваюй, ваюй, салдат!
Выступай за радам рад!
За гарой, за лесам ліха, смерць блукае,
А крумкач у госці крумкача склікае.
Эх, ваюй, ваюй, салдат!
Па зямлі паўзі, як гад.