дотого, што не безъ малого забуреня и ображеня пришли, же Слово Боже зъ латинскихъ и иныхъ писму своимъ тежъ езыкомъ прирожонымъ перекладати и читати почали.
Але далъ бы то Панъ, ижъ бы вы каждый отъ себе, о зацные панове, котори есте тои речи якобы отцами по такихъ отцами фалебныхъ предкахъ своихъ позостали и на мѣстьца ихъ вступили, поневажъ въ томъ або жадное помочи люцкое дле грѣху нѣтъ, або толко тому зъ милости ку отчизнѣ вашой помочи бысте могли, гдыжъ простота человѣка бѣдного, посполитого на васъ очи завжды удавала и удаетъ и за вами идетъ.
Въ тую потребу отчизны вашое простоту грубую про недостатокъ науки брати вашое прикладом своимъ милосернымъ, если есть што милости братерское у васъ, — гдыжъ межи всими дюцкостями ничого не есть такъ власного, а злаща богобойному человѣку, яко улитоване, которымъ указуем по собѣ нѣякое подобенство добротливости Божее, а наконецъ дле заплаты собѣ от Пана вѣчное, — тому народу нашому, неумѣетностью заведеному и утрапеному, допомогаючи, митрополита вашого, владыкъ и учителей ваших до того прозбами вашими вели, же бы не подкуповъ, не посуловъ дле посѣданя столиць один передъ другимъ, не доживотей и привилѣевъ одинъ надъ другого обварованѣйшихъ, але Слова Божего сами се учили и других зъ маетностей и имѣней, отъ вашихъ предковъ имъ не на марнотрацства, не на строи и што такого, але дле наукъ наданыхъ. Ова бы ку науцѣ, — лечъ не такой, яко теперъ на вѣчный свой встыд толко прочести и то ледво, въ своемъ езыку не болшь учатсе, — школы заложити и науку Слова Божего, отъ такъ много лѣтъ занедбаную выдвигнути братьи ваши хотели и усилвали. Которыхъ я не одному которому, але всимъ и с тою потребою отчизны вашое богобойности пилности, ростропности и вѣрности поручаю и зоставую, просечи Пана, абыхъ былъ готовъ, если она до конца згинетъ, зъ нею загинуть, або, если черезъ ваш ретунокъ будет выдвигнена, зъ вами и зъ нею выбринуть.
А тутъ вжо конець рѣчи моей чиню, которую замыкаючи, и то къ жалости моей молю, если на тотъ часъ за нашу невдячность милосердья бы Божого не было, тую казнь отъ насъ отдалити. Злаща теперъ на око видимъ, ижъ вездѣ вси рѣчи злыми розсудками такъ суть попсованы, и не может быть ничого такъ добре поведено, на што бы потваръ не могла быть учинена, ани тежъ жадинъ отъ того, чого се разъ хватить, отступить не хочетъ, абы се не здалъ в чом поблудить. Еще тежъ ижъ посполите бываеть, же живого чело-
