Гэта старонка не была вычытаная
Няма ў жонкі солі,
Чытаць хочуць дзеці,
Яму-ж трэба болей —
На ўсё трэба меці.
Гасьцінцамі з крамы
Усіх ён надзеліць…
Эх, дзеці, бог з вамі!
Сягоньня нядзеля!
Сеў, выехаў Янка,
Махаючы пугай,
Ад самага ганку
Бяжыць дзятва кругам.
Вот зьехаў між гоняў
Абсеяных ніваў,
Дзятва ўсьлед гамоніць:
Едзь, бацька, шчасьліва!
Трушком чапурыцца
Кабылка да цэлі,
Ёй таксама сьніцца
Сягоньня нядзеля.
Як скінуці вокам,
Знаць сьвята ў сьвятліцах,
Звон гулам далёкім
Нясецца з бажніцаў.
Як звон грыміць сьвету
Нудлівым выразам, —
Сава ў хвілю гэту
Заводзіць з ім разам.