Старонка:Янка Купала. Збор твораў (1925–1932). Том 6.pdf/133

УРЫВАК З ДРАМАТЫЧНАЙ ПОЭМЫ

ДЗЕЯ I

Зьлева ўправа к ахвярнаму месцу ідуць варажбіты-вядуны дзяўчаты, прысьвечаныя Пяруну. Затрымліваюцца пад сьвятым дубам.

Зьява 1-я.

БАЙМІР (варажбіт)

Небу і грому,
Сонцу жывому,
Месяцу, зорам
Песьню мы творым,
Хай чуе нас мал і вялік!
Хай чуе Пярун-Грамавік!

Веру старую
Хай зачаруе
Наша закляцьце
Ў полі і ў хаце,
Каб зьменьнікаў цемрай зьмяло,
Каб ссохла няверы зяло!

ХОР

Пярун, Пярун, тачы, вастры
Ты востра блыскі, стрэлы,
І здраду звуглі на кастры
На попел амярцьвелы!
Пярун, Пярун, Пярун!

НЯЎЗІРА (варажбітка)

Ясным дзяньніцам,
Цёмным начніцам,