Гэта старонка не была вычытаная
ПРЫ 3-м СТОЛІКУ
1-шы
да 2-га
Што гнеш свой карк, як вол у плузе,
Зямлю капаючы нарогам?
Пі, як канюх расу на лузе, —
Ярмо ты знойдзеш за парогам.
2-гі
бяручы чарку
За тыя пухавы пасьцелі,
За торпы, стогі аж пад неба, —
За тых усіх, што хлеб мой елі,
Пакуль мне тут ня далі хлеба!
ПРЫ 4-м СТОЛІКУ
1-шы
да 2-га
Што круціш сумна галавою,
Як касьцяломнаю машынай?
Пі, каб аж трэсла ўсім табою,
Як трасе вецер павуцінай.
2-гі
падымаючы чарку
За тую комінную сажу,
За сьвіст гудкоў, за дым крывавы, —
За тых усіх, хто мяне пражыў,
Пакуль гарэць тут не заставіў!
ПРЫ 5-м СТОЛІКУ
1-шы
да 2-га
Што сеў, як мокрая варона?
Пі, як кроў смокчуць з тваіх косьцяў!
Заліся гараю шалёнай,
Каб аж тапелец пазайздросьціў.
