Гэта старонка не была вычытаная
МАЛАДЫ
садзіцца ля маладой абнімаючы, прытульвае к сабе і супакойвае
Ціха, міленькая, ціха.
Як прышло, так пойдзе ліха;
Пагаруем, пабядуем…
Дасьць бог — хату адбудуем…
Горка ўсьміхаючыся.
І вясельле дагуляем…
МАЧЫХА МАЛАДОЙ
выбягае, задыхаўшыся, за боку пажару
Ах, ах! чым вас прывітаем?..
Чула, чула, галубочкі,
Вашы звонкія званочкі!..
Так усе мы вас чакалі:
Каравай прыгатавалі, —
А які-ж, ах, быў удачны!
Каб вы зналі — які смачны!
СВАТ
п‘янаваты, панура
Відно смачны, бо смалілі,
Што аж хаты ў дым пусьцілі.
МАРШАЛАК
Знаць, згуляці захацелі
Бяз шлюбоўнікаў вясельле.
МУЗЫКА
Але толькі бяз музыкі —
Пад пажарныя скавыкі.
ВОЙЧЫМ МАЛАДОГА
выходзіць з боку пажару з пустымі, як і мачыха, рукамі
Ну, прыехалі, нарэшце!
Вось чым сэрцайка пацешце,
Малады і маладзіца.