2-е ВІДМА
На, і ўчэцеся ахвоты
Шанаваць закляцьця сплёты.
Сядзьце роўна і пакорна:
Як калоды — так праворна,
Як у пні клін — так свабодна,
Як дамоўкі — так выгодна.
Ад граніцы да граніцы
Страж мая тут — паляўніца.
Дум згасеце ўсе праявы:
Цемра тут закон і права!
ТАВАРЫШ 3-га ВІДМА
кабета
Ад усходу да ночы
Так йшла ў постаці зьвінна —
Смольлю пот лёз у вочы,
Хоць круці — кашуліна.
А тут платы замнога
Кажуць, хоць гэтак мала…
Наце! Што-ж? ваша змога,
Наша дзе не прапала.
3-е ВІДМА
з насьмешкай
Вось табе падмога ў працы
Па скарб лезьці у палацы,
Дабівацца ў валадарства
Цёмна-ночнага мацарства.
Сядзьце квола, асьцярожна;
Гляньце там, тут а трывожна, —
Як пыліны — так забыты,
Як атопкі — так прыбіты.
Ажані тапор з няславай, —
Цемра тут закон і права!