Гэта старонка не была вычытаная
V
ЗА САХОЮ
Поле. Неба яснае. У недалёкай зялёнай дуброве кукце зязюлька. Мужык арэ. Конік, малы і худы, штомінуту прыпыняецца. Над галавой аратага пяюць жаваранкі. Гасьцінцам прыбліжаецца падарожны
АРАТЫ
ходзячы за сахой
Гэй-жа, баразною,
Косю мой маленькі,
Гэй-жа, за сахою,
Селянін худзенькі!
Гэткае раздольле
На усе староны!
Выарам мы поле
Ў скабіны, ў загоны.
Зерня ў полі зложым.
Жменяй спрацаванай;
Зарунейся збожжам,
Цьмяная паляна!
Пройдуць гэтта людзі,
Бедны і багаты.
Дзіўна, дзіўна будзе,
Што зрабіў араты?
Гэй-жа, баразною,
Косю мой маленькі!
Гэй-жа, за сахою,
Селянін худзенькі!
