ГАРОШКА
Дзе там! Дарма толькі вытаптаў з паў-Менску, — як у шабас, усе крамы пазачыняны. Паеду без табакі.
АЛЕНКА
(жартаўліва)
Якое няшчасьце! Гэта-ж як у таткі пачнецца вялікі табачны пост, дык задасьць ён усім нам табакі!
ГАРОШКА
(дабрадушна)
Табакі не табакі, а перцу калі-небудзь дастанеш ты ў мяне за свой доўгі язык.
ЯНКА
Хаця не пабецеся стары з малой за табаку. Мушу хутчэй вас адгэтуль весьці. (Да МІКІТА, адвітваючыся). Бывайце здаровы, пане рэгістратар! Жычу вам у новай аратарскай професіі дастукацца асэсарскай рангі.
МІКІТА
І вам таго самага, пане беларус, у вашай, меджду протчым, беларускай профэсіі.
ЗЬЯВА ІX
СЬПІЧЫНІ — МІКІТА
СЬПІЧЫНІ
Даруйце, мусье Зносілов, што змусіў вас крыху на сябе чакаць. Але апошнія дні так многа маю лекцыяў па аратарству, што папасьці ўсюды ў свой час няма аніякай змогі.
МІКІТА
Я вельмі рад, што ўсё-ж-такі вам, гэр профэсар, удалося ка мне папасьці. Бо выступаць, меджду протчым, з трыбуны без практычнай лекцыі неяк ні сёе ні тое.