рсьтью верблюжою, и поесъ кожаный около бедръ его, едучи акриды и медъ дикий. И проповедалъ мовечи, иде моцнейший мене всьледъ мене, которому не естомъ годенъ припадши розвезати ремена ботовъ его. Я исьте окресьтиломъ васъ в воде, лечъ тотъ окресьтить васъ духомъ сьветымъ.
И было в оных дняхъ, пришолъ Исусъ от Назарета Галилейского, и окресьтилъсе от Иоана в Ердане. И на тых местъ выходечи з воды, увиделъ розводечися небеса, и духъ якъ голубъ сходечий на него. И голосъ былъ з неба: ты еси сынъ мой умилованый, в которомъ уподобаломъ. И на тых местъ духъ выпъхнулъ его в пустыню. И былъ тамъ в пустыни дней сорокъ кушоный сатаною; и былъ з зьверми, и аньгели служили ему. А по выданью Иоановомъ, пришолъ Исусъ до Галилеи, проповедаючи еваньгелие королевства Божьего, Мовечи, ижъ наполнилъсе часъ, и приближилосе королевъство Божъе, покайтесе, и верте в еваньгелие. И ходечи при морю Галилейскомъ, увиделъ Симона и Андрея, брата того [Симона], мечучихъ сети в море, были бо риболовы. И рекъ имъ Иусъ: пойдите всьледъ мене, и учиню васъ быти ловцами людей. И на тых местъ оставивши сети свои, шли за нимъ.
И прошодши мало оттуле, узрѣлъ Якова Зеведеового, и Иоана брата его, а они в лодьи направляли сети. И на тых месъ-
