лъ имъ Исусъ. И увидевши его, поклонилисе ему, а иншие вутпили. И приступивши Исусъ, рекъ им, мовечи: дана ми каждая владность на небе и на земли. Шодши научите вси народы, кресьтечи ихъ, во имя Отца и сына и сьветого духа. Учачи их ховати, всего што приказаломъ вамъ, и ото я с вами естомъ, по вси дни, до сконченья века. [аминь]
Конецъ Евангелии писанья сьветого Матфѣя, о которой при словеньских положоно, ижъ ее по и летех, Христового на небо взнесенья, подалъ.
ЕВАНГЕЛІЯ
СВЕТАЯ ИСУСА ХРИСТА
написаная черезъ Марка
светого.
Глава А.
Початокъ Евангели Иисуса Христа сына божьего. Якъ есть написано в пророцѣхъ: ото и посылаю Ангела моего перед обличьемъ твоимъ, которий зготовитъ дорогу твою перед тобою. Голоса кричачого впустыни: готуйте дорогу панскую, простые чините стежки его. Былъ Иоанъ крестечи в пустыни и проповедаючи крещѣнье покаянья на отпущенье греховъ. И выходила к нему вся Юдская сторона, и Ерусолимляне, и крестилисе все въ Ердане рецѣ от него вызнаваючи грехи свои.
А былъ Иоанъ оболоченъ ше-
