тъ возвалъ их, и оставивши Отца своего Зеведея в лодьи з наймиты, шли за нимъ. И ввошли в Капернаумъ, а на тых местъ в суботы вшодши в згромаженье училъ. И дивилисе о науцѣ его: былъ бо учачи ихъ якъ владносьть маючий, а не якъ учоные.
И былъ в згромаженью ихъ чоловекъ, в духу нечистомъ, и заверещалъ. Мовечи: занехай, што намъ и тобе Исусе Назареньский, пришолъ еси губити насъ, знаю те хто еси, сьветый божий. И заказалъ ему Исусъ, мовечи: умолкни, и выйди з него. И стресши его духъ нечистый, и закричавши голосомъ великимъ, и вышолъ з него.
И злеклисе вси, ижъ розмовляли они з собою, мовечи: шъто есьть то? што за наука новая то, ижъ з владностью и духомъ нечистымъ росказываеть, и слухають его? Вышолъ пакъ слухъ о немъ на тых местъ по всей стороне Галилейской.
И на тых местъ з згромаженья выходечи, пришли в домъ Симоновъ, и Андреевъ, з Яковомъ и Иоаном.
А теща Симонова лежала огневою жгучая, и на тых местъ мовили ему о ней. И приступившисе взвелъ ее, и нявши за руку ее, и оставила ее огневая на тых местъ, и служила имъ. Позну пакъ будучи, гды заходило солнцѣ, приносили к нему въси немоцные в бешаные. И былъ весь городъ собралсе къ дьверемъ. И уздоровилъ многих лихо мучачихъсе розличными немоцъми, и бесовъ многихъ выгналъ, и не допущалъ мовить бесо-
