старейшинстве, глава 2): «яко Господь Исусъ Христосъ на земли былъ головою, паномъ и мистромь учневъ Своихъ, и отцомь и пастыромъ, такъ коли постановилъ на столицу отцовскую вступить, Петра имъ далъ за преложного, за отца и мистра, а однымь словомъ мовечы - далъ его за наместника Своero». То патриярьха Царогородъский противъ Грековъ. Перестань на тыхъ Греческихъ отцохъ, брате неупорьный, поневажь ижъ Исус Христосъ въ церькви Своей хотелъ меть единовладьство або монарьхию, абы одинь всего догледаль и рядилъ.
Яко рядъ и преложеньство одного пастыра съ Петромъ светымъ не умерло, але на Рымскихъ бискупахъ и папежахъ стануло.
Роздѣлъ 4.
Тое преложеньство Петра светого смертью его устать не могло. Бо костелъ Божый и овцы Христовы трваютъ аж до конца света и мусять меть такое опатрене и рядъ для збавенья своего. Кождая зверхность не для того есть, што на ней седить, але для тыхъ, которыми рядить. Еслижь за часу Петра светого костелъ такого старшого, якого Христосъ поставилъ, потребовалъ, — далеко болшъ по смерти Петра светого, кгды се на весь светъ розшираль. И для того оныхъ словъ, которые Панъ до Петра мовиль: «паси овцы Мои», не можетъ быть инакшое розуменье, одно ижъ тотъ урадь пастырства и на потомки Петровы стегатьсе маеть. Што Златоустый светый далъ знать, кгды мовить (въ книгахъ вторихъ о иерействе): «за овцы Свои Хри-
