въ Аньхорате: «тотъ есть, мовить, Петръ, который услышалъ: паси овъцы Мое, которому поверона есть овъчарня».
Кириль Ерозолимъский [въ] Катехизме Петра светого «княжатемъ апостольскимъ» зоветь. И Кирилъ Алексанъдрийский такъ мовить (въ толъковани светого Яна, глава 64): «яко преложоный и голова иныхъ первъшый Петръ заволалъ: Ты еси Христосъ Сынъ Божый».
Иоан Златоустый (въ гомилии 11 на евангелисту Матфея): «Петра, дей, церъкви пришлое пастыромъ учиниль». И нижей: «Самъ то Панъ Богъ справить моглъ, ижъ церковъ пришлая, кгды на нее такие и такъ великие навальности были, целая и ненарушеная зостала, которое пастырь и голова чоловекъ рыболовъ и подлый есть». И нижей: «Еремияша надъ однимъ народомъ преложилъ Панъ Богъ, а Петра надъ всимъ светомъ Христосъ поставилъ».
Ѳеоѳилакт (на главу 22 Луки) на оные слова «укрепляй братю свою» такъ мовить: «ясное есть розуменье тыхъ словъ: маю тебе за княже и преложоного надъ иными учънями, коли по запрению покутовать и плакать будешъ, потверъжай братю. Бо то тобе належыть, который еси по Мне есть опокою церъковъною и ѳундаменьтомъ». Добре мовилъ «по Мне», бо Христосъ есть церък[в]и светое каменемъ и основаниемь, яко Павелъ светый мовить, але яко начальникъ до спасения и невидомое благодати даваня. А Петръ светый тежъ есть каменемъ и основанемъ, але до правления зверхьного и до науки, яко слуга и наместникь Христовъ.
Генънадей Схолярый, патриаръха Царигородъский, такъ тежъ пишеть (о
