Петръ светый наперъвшою есть головою церкви Божое, на которомъ се вся спираетъ. Што значней еще Хрыстосъ далъ знать, коли мовилъ: «тобе, а не иному, дамъ ключы царъства небесного». Кому отъ места ключы отдаютъ, за найвысшого урядника прызнаваютъ его. И хто всимъ, што въ дому есть, владнетъ, тотъ господаромъ есть всее челяди, который подъ своимъ ключомъ все ховаетъ. А назначней еще учинилъ Господь Петра пастыромъ всихь овецъ Своихь, коли мовиль: «паси овцы Моя: паси бараны Мое». То Еванъгелия! Хтожъ ей верити не хочеть, самъ толко поганинъ и Жыдъ! Слухай же на тые слова Господние о Петре светомъ своихъ Греческихъ докторовь, (учителей) и писаровь:
Орыенесь на 5 главу листу Павла светого до Рымлянъ: «кгды навысший рядъ и преложенство о пасенью овецъ Петрови давано, абы на немъ, яко на кгруньте, ѳунъдованая была церъковъ, — жадъное инъшое цноты вызнанья оть него не вытегаючи, одно милость».
Василей (слово о суде Божомъ): «онъ, поведа, благословеный Петръ, которыи надъ иные учни преложный есть, которому ключы царства небесного поручоны суть».
Назыанзень (о порядъномъ гадательстве: який порядокъ въ гаданью заховати маемъ) пишучы мовить: «смотры, яко межи учнями Христовыми, которие вси были великие и обранья годъные, тотъ каменемъ названый есть, и основание церьковьное вѣре своей повероное маеть. А другие учневе ижъ занехани суть, покоръне то зносять».
Епиѳаней (ереси 51): «Петра, поведа, обралъ, абы былъ вожомь учневь». И
