и зъ геретыками се списовали. Бо нихто своего спротивъника до рады не береть; а лепей упорного минуть, нижаи его противь собе острыть, яко писмо мовить въ Приповѣстяхъ Саломоновыхъ: «хто научаеть насмевцу, самъ собе крывъду чынить; а хто кареть незъбожного, самъ себе мажеть». Певне тые, што зъ геретыками деръжать 4, до едности не помогуть. Бо геретыки, где могутъ, зъгоду костельную торъгаютъ, абы овъцы роспрошоные лацней окромъ громады и пастыра поимать и пожырать могли. А што ся отступенья патриархии дотычеть, на то не тымъ противникомь геретыкомъ, которые ее давно отступили, але верьнымъ Восточное церкви людемъ справу даемь, зъ самыхъ же Греческихъ докторовъ, учителевъ и гисториковъ, Латиньскихъ на тотъ часъ занехавши.
Яко монархія або единовладство церковное въ Евангеліи
фундовано есть.
Хто верыть Евангелии, а слепоты геретыцкое не припущаетъ, видить и ледве не пальцомь дотыкатьсе можетъ, ижъ Господь нашъ Исус Христосъ Петра светого старьшымъ и наперъшимъ урядникомъ церкви Своее надъ иные апостолы учиниль. И если то прожъные слова Господъние до Петра светого суть: «на тобе збудую церъковъ Мою, бось ты есть опока и камень»? Яко ѳунъдаменътъ наперъвая есть речь, которая все будованье дерьжитъ, такъ
