книгахъ 2, глава 19 судовъ светскихъ зъ духовъными, съ тогожъ права Божого научный, не смелъ змешать; але до каплановъ (об. 23) мовить: «где есть пытане о законе, о росказаню Божомъ, о церемонияхъ, усправедливеню - указуйте людемъ, абы противъ Пану Богу не грешили». А особно до судей светскихъ мовить: «такъ а такъ судите, даровъ не берыте», и далей.
Написалъ Метаѳрасть Греческий въ «Животѣ светого Ницеты», о образы умучоного, ижъ до цесара Арменика иконоборцы тые слова мовилъ Теодорь казнодея: «слухай, цесару! не вдавайсе въ речи церковъные и ряду ихъ не переворочай. «Постановилъ Панъ Богъ въ церкви, мовить Павель светый (1 Кор. 12 ), напервей апостолы, второе пророки, третее пастыри, учители» на досконалость светыхъ. А королей нигде не вспоминаеть. Тобѣ, цесару, светское панъство и войско злецоно есть, тогожъ ты пилнуй, а справы церковные пастыромъ и учителемъ позоставъ». Штожъ бы тымъ паномь и шляхте посполитой реклъ, которые се о то гневаютъ, ижъ ce ихъ около науки и арьтыкуловъ веры владыкове старшие (24) ихъ не радили? Реклъ бы имъ былъ, и мы то мовимъ: смотрите своихъ речи посполитое и жолнеръскихъ справъ; рядите до мами своими, не наукою церковною, ани старъшими вашими, о которыхъ вамъ росказалъ Панъ Богь черезъ апостола, мовечы (ко Евъреемъ, 13): «поминайте наставъники ваша, иже глаголаша вамъ слово Божее: ихже взирающе на скончание жителства, подражайте веру ихъ». И далей тамъ же:
