науки и рядовъ церъковъныхъ задеръжаня не дають, але рачеи все лакомъствомъ и для пенезеи мешають, а иногды хрестиянские справы Туркомъ выдають; лечь имъ о то идеть, и то ихъ болить, ижъ се владыкове злучили съ костеломъ светымъ Рымъскимъ, где наука и побожность християньская цвите. Бо тые вси, што се противъ тому собору списали, окромъ мало розумъныхъ поповъ и чернъцовъ, давно не только столицу Царогородскую, але и веру ихъ Греческую покинули, явне и церкви и попы баламутнею и балвохвалствомъ зовучы, а новые собе и розные веры вымышляючы, на знищенье Греческое и всее християньское (веры). Другая ихъ речь болить, ижъ се ихъ въ томъ прыстанью до костела владыкове не радили, ани ихъ призволенья чекали, прывлащаючы собе въ томъ духовъную звирхъность и власть, и съ того собе славу чынечи, до чого ничого не мають, а где и на чомъ правъдивое славы искать - не видять.
Претожъ на тое се имъ первеи пове.
Ижъ не была винъная речь светъскимъ ce съ такою униею оповедать.
Роздѣлъ 2.Арътыкулъ вѣры есть: «вѣрую въ единую светую соборную и апостольскую церьковъ». О которой выклады чынить и розуменя збавенные давать — самымъ духовнымъ, епископомъ належить. Владыкове и епископи зъ науки католическое такъ тотъ арътыкулъ розумеють: ижъ одна церъковъ быть не можеть на земли, коли одного справъцы не маетъ, который бы одну веру задеръживалъ, и вси християны въ едно
