преложоного. Приступило до того дозволенье короля его милости, безъ которого въ панъстве его жадьному подданному зъездовъ и громадъ чинить се не годить, — а не толко позволене, але и выправа пословъ на тотъ собор, для спокойного речей духовныхъ отправованя.
Были тежь на немъ особы до собору власне належачые, то есть: (аръхиепископи,) епископи або владыки, которые сами правомъ Божимъ на томъ трыбунале соборовомъ власть мають. Бо они сами сутъ, яко писмо мовить (въ Деянияхъ Апостолскихъ 20), «отъ Духа Светого поставени, абы рядили церковью Божою, (об. 20) которую откупилъ кровью Своею». Иные тежъ зъ собою свещенники и презвитеры учоные и побожные привели, не для судовъ и заседаня, але для помочы и рады. Были тежъ и светские зъ рамени короля его милости и иные добровольне прыеждаючые.
Зобралъсе тежъ тотъ соборъ на речь светую и збавенную и потребную. Не ижъ бы вѣру становилъ, або о арътыкулахъ ее выкладыдавалъ (бо то самымъ вселенскимъ соборомъ и за всего християнства зобранымъ епископомъ належить), але жебы то выконали, што черезъ послы свое до отца светого папежа всказали, и што имъ поручоно было. То есть: абы зъехавъшисе, съединение вѣры светое и вси eе артыкулы и члонки вызнали, и руками своими подписали, хотечы такъ научать, яко отъ апостоловъ светыхъ подано, и въ писме светомъ умоцнено, и одъ отцовъ светыхъ старожитныхъ Греческихъ и Латинскихъ сукцесыею и въступованьемъ порядънымъ зоставлено, одъметаючи новины и науки гере-
