Адзінай стромай, сілаю адзінай, —
Да вас, да нашых слаўных брыгадзіраў,
Я маю шмат канкрэтных прапановаў:
Хай садавод хутчэй агледзіць дрэвы,
А палявод ні кроку ад пасеваў.
Азіміну ня ніва родзіць,
А тое, што яе скародзяць.
Бярэце заўтра лёгкія бароны
І, ледзь зара у высі ўстрапянецца, —
Вы ўсе, як ёсьць, жытнёвыя загоны
Паскарадзеце!
Пасьля з брыгадай трактарнае сілы
Дакончыце ральлю на полі…
Ты, трактарыст, шануй свае машыны,
А конюхі, шануйце коні…
Дзе аграном?! Паслаць за аграномам!..
СІНІЦКІ:
— Дазвольце я, таварыш старшыня…
Хадзіць, канешне, мне ня нова,
Для вас заўжды, канешне, я…
СОРМАВЕЦ:
— Ідзі хутчэй, ды доўга не марудзіць!..
СІНІЦКІ:
— Вось зараз-жа і аграном тут будзе.
СОРМАВЕЦ:
— А ты, гароднік, разам з паляводам
За працаю на лядах пасачэце!..
Там будуць слаўныя, прыгожыя гароды,
Дзе зараз пнеўя ды карчэўя.
