Старонка:Збор твораў (Бядуля, 1937). Том I.pdf/12

∗∗∗

Хоць ты разарвіся —
Не ідзе рукой.
Прырасла нядоля
Хвойнаю смалой.

Дзень за днём праходзіць
Зграяй чорных дум.
Злы смяецца швагер
І багаты кум.

Дзе набыў, — не знаю, —
Свой паганы лёс.
Заяц пераскочыў
Сцежку праз авёс?

Можа ад гультайства
Маю многа мук?
Праца не выходзіць
З гарапашных рук.

Дзень за днём мінае,
Маю шмат турбот.
На абшарах панскіх
Лью салёны пот.