Старонка:Заранкі (1924).pdf/94

У ВЁСЦЫ.

Хаткі над рэчкаю
Цесна стаяць;
Дрэўцы зялёныя
Сьцішна шумяць.

У пушчы, за рэчкаю,
Птушкі пяюць,
А над вадзіцаю
Ка̀ні снуюць.

Неба блакітнае,
Рэчка блішчыць.
Сонейка яснае
Ўсё залаціць.

Ў вёсцы па вуліцы
Дзеткі бягуць;
Звонкія, гулкія
Зыкі лятуць.

Дзеткам тут весела
У коні гуляць,
Добра па вуліцы
Качку качаць…

БАБУЛЬКА І КОЗЬЛІК.

(З народнае казкі).

Шэранькі козьлік
Жыў у бабулькі,
Быццам у роднай
Мілай матулькі.
Козьліка бабка
Дужа любіла,
Ў хатаньцы цёплай
Вельмі пясьціла.