Старонка:Выбраныя вершы (Чарот, 1925).pdf/9

ЗАРУНЕЛА, ЗАРУНЕЛА…

Зарунела, зарунела аксамітам…
Рэчкай срэбнай — сонцам залілося…
На палёх здратованых, прыбітых
Паглядзі!.. Вясну радзіла восень.

Маладняк зялёны бач кудравіць
Ахіляе край яскравым лісьцем…
Аб здабытай вольнасьці і славе
Маладняк шапоча ў песьні-сьвісьце.

Зарунела, зарунела аксамітам
Рэчкай срэбнай — сонцам залілося…
Паглядзі!.. Над краем ужо зьвіты
Промені — жытнёвыя калосьсі.

Барацьбой гартованы, расправай…
На прастор, у сінь прыгожа выйсьці…
Аб здабытай вольнасьці і славе
Маладняк шапоча ў песьні-сьвісьце.