Спадчына (1922)/IV/Быў гэта сон…

← Пахаваньне

Быў гэта сон… Верш Аўтар: Янка Купала 1922 год

Успомні… →

Іншыя публікацыі гэтага твора: Быў гэта сон…

Прапануем да спампаваньня!

БЫЎ ГЭТА СОН…

Быў гэта толькі сумны сон
Душы расплаканай маей,
Што сярод бледных будніх дзён
Я сьвята меў, глядзеў сьвятлей.

Быў гэта толькі сумны сон,
Што у вачох яе скрозь сьмех
Чытаў сьвяты сабе закон
Каханьня шчырага і ўцех.

Быў гэта толькі сумны сон,
Што вось інакшая яна,
І пойме болю майго стогн,
Зірне ў душу маю да дна.

Быў гэта толькі сумны сон,
Што разьвяду я з ёй бяду,
Што пад яе напеваў звон
Лягчэй к магіле дабрыду.

Ўсё для мяне быў гэта сон;
Хтось іншы яву меў ў жыцьці,—
Ён ёй і мне стварыў прытон,
А сам зыйшоў, каб… ня прыйсьці!

3/I—15 г.