Спадчына (1922)/I/Калі пачнуць

Калі пачнуць
Верш
Аўтар: Янка Купала
1922 год

Іншыя публікацыі гэтага твора: Калі пачнуць…

Прапануем да спампаваньня!

КАЛІ ПАЧНУЦЬ…

Калі пачнуць зьбірацца хмары
І неба ўсьцелюць чарнатой,—
Тады ўсплываюць буйны ветры
І віхрам гоняць над зямлёй.

Адвечным борам закалышуць,
Сухі ліст з лесу гоняць проч,
Ніштожаць хмар калматых горы,
І ясным днём зьмяняюць ноч.

Калі прыгнецены няпраўдай
Які зьнябудзецца народ,—
Тады зьяўляюцца прарокі
І ўсенародны клічуць сход…

Расьце на сходзе недавольства,
А дудароў магутны хор
Пяе аб крыўдах і ўсіх кліча
Да новых праўд, да новых зор.