Радасны будзень (1935)/VI/Учора пыл курэў ад гміны

← Учора вецер біў у дзверы

Учора пыл курэў ад гміны Верш Аўтар: Уладзімір Хадыка 1935 год

Уласніцкіх двароў эдэмы →

Прапануем да спампаваньня!

Учора пыл курэў ад гміны,
Ўлягаўся свіст жандарскіх пят.
Гула туга на дамавінах,
Глыбела логіка гармат.

Як звер падстрэлены, ятрэла
Шляхецкай навалачы злосць.
За песняй — „у бой мы пойдзем смела“ —
Расла другая маладосць.

Дні набывалі новы профіль,
Выкоўвалі, каб светла днець —
Пачатак маладой эпохі,
Старой разваліне — канец.

Учора вецер мёр на грудзе,
Ў блакіце хмары не плылі.
Кіямі баранілі людзі
Мяжу натрапленай зямлі.

У зайздрасці шалёнай скрэблі
Каструбаватых рук луску,
І пад настрой ламалі рэбры
За жменю гною і пяску.

Ў раллю нечалавечым крыкам
Кідалі боль патрэб сваіх
І сточвалі шнуры — з разлікам
На душы мёртвых і жывых.