Плача восень

З пляцоўкі Вікікрыніцы
Jump to navigation Jump to search
Плача восень
Верш
Аўтар: Янка Купала
1915
Крыніца: http://rv-blr.com/vershu/view/31603


Плача восень за вакном,
Сьлёзы плюскаюць аб шыбы,
Абняла трывожным сном
Непрытульныя сялібы.

Плача восень, стогне ў сьне,
З пушчай, зь ветрамі галосіць,
Як бы дзе каго кляне
Ці аб шчасьці моліць, просіць.

Плача восень ноч і дзень,
Сьлёзы плюскаюць аб вокны,
А па хаце чорны цень
Лазіць, тчэ свае валокны.

Гэта ходзіць, бродзіць сум,
Душу мучыць ў сваіх сетках
І трывожыць сказы дум,
Дум аб шчасьці і аб кветках.

(1915)